៥ ចំនុចអ្នកចិញ្ចឹមគោត្រូវចេះពិនិត្យមើល មុនសម្រេចទិញគោបាដើម្បីទុកធ្វើពូជ

គោបាល្អនឹងធ្វើឱ្យកសិដ្ឋានចិញ្ចឹមទទួលបានកូនគោស្អាតៗដូចគ្នាដែរ ទើបក្នុងការចិញ្ចឹមតាមបច្ចេកទេសតម្រូវឱ្យអ្នកចិញ្ចឹមត្រូវចេះមើលគោ និងមានរៀបចំកម្មវិធីវាយតម្លៃលក្ខណៈសម្បត្តិគ្រប់គ្រាន់របស់គោដើម្បីទុកធ្វើជាបាពូជ។ ការចេះមើលគោបានឹងជួយឱ្យអ្នកចិញ្ចឹមអាចសម្រេចចិត្តជ្រើសរើសបាល្អបំផុតក្នុងហ្វូងទុក ឬទិញយកបាថ្មីណាដែលល្អៗបានត្រូវសម្រាប់ចិញ្ចឹមក្នុងកសិដ្ឋានខ្លួន មិនថាក្នុងគោលបំណងសម្រាប់ទុកបង្កាត់ពូជ ផលិតមេជីវិតបង្កក ឬទុកចូលរួមការប្រកួតគោឡើយ។ ទោះក្រោមហេតុផលណាមួយក៏ដោយ ការជ្រើសរើសគោបាបានត្រឹមត្រូវមានន័យថាអ្នកនឹងទទួលបានលក្ខណៈសម្បត្តិល្អៗបញ្ជូនពីបាទៅកូនជំនាន់ក្រោយ ដែលនេះនឹងធ្វើឱ្យកសិដ្ឋានអ្នកអាចកែលម្អពូជបានឆាប់ និងទទួលបានប្រាក់ចំណេញរយៈពេលយូរអង្វែង។

ជាបច្ចេកទេស ដើម្បីឱ្យការជ្រើសរើសបាមានលក្ខណៈពេញលេញ អ្នកចាំបាច់ត្រូវពិនិត្យនិងវាយតម្លៃលើផ្នែកសំខាន់ៗជាច្រើនដូចជា ការវិនិច្ឆ័យលក្ខណៈសម្បត្តិខាងក្រៅ (Physical), សរីរបន្តពូជ (Reproductive organs), ការវាស់ទំហំពងស្វាស (Scrotal circumference), ការវាយតម្លៃគុណភាពស្ពែម (Semen quality), ចំណង់ភេទ (Libido) និងជំងឺ។ ប៉ុន្តែ ខ្លឹមសារក្នុងអត្ថបទនេះ សូមបង្ហាញត្រឹម ៥ ចំនុច ដែលជាផ្នែកមួយនៅក្នុងការវាយតម្លៃលក្ខណៈសម្បត្តិខាងក្រៅ ដោយពិនិត្យលើដំណើរ, ទម្រង់ជើង និងក្រចកជើងគោប៉ុណ្ណោះ ព្រោះវាមានលក្ខណៈសាមញ្ញដែលអ្នកអានទូទៅអាចងាយយល់បាន។

១. ការពិនិត្យដំណើររបស់គោ

ជាការពិតណាស់ ដើម្បីវាយតម្លៃឱ្យបានពេញលេញលើលក្ខណៈសម្បត្តិខាងក្រៅរបស់គោសម្រាប់ទុកធ្វើបា ចំនុចមួយដែលអ្នកអាចធ្វើបានដោយខ្លួនឯង គឺត្រូវពិនិត្យមើលលើទម្រង់ជើង ប្រអប់ជើង និងក្រចកជើងរបស់សត្វនោះ ទាំងពេលដែលវាកំពុងឈរ និងដើរទៅមកលើផ្ទៃរាបស្មើទៅតាមឥរិយាបថធម្មជាតិរបស់សត្វ។ ទោះបីជាសត្វដើរនៅលើវាលស្មៅ ឬក្នុងក្រោលក៏ដោយ ក៏គេអាចវាយតម្លៃបានយ៉ាងងាយស្រួលដូចគ្នា ដោយត្រូវសង្កេតមើលដំណើរដើរ និងជំហ៊ានរបស់គោនៅពេលសត្វនោះដើរទៅមកតាមដំណើរធម្មតា។ គោដែលល្អត្រូវមានការបោះជំហ៊ានទៅមុខដោយរលូតស្មើល្អ ហើយជំហ៊ានជើងក្រោយនីមួយៗត្រូវជាន់ចំកន្លែងស្នាមជំហ៊ានជើងមុខ។

២. ការពិនិត្យស្មាមុខ

ជាធម្មតា ឆ្អឹងស្មាមុខរបស់គោមានគន្លាក់បត់កោងដូចធ្នូ ហើយមុំបត់សមស្របដែលអាចទទួលយកបាននោះគឺពី ៤០-៦០ដឺក្រេ។ ចំណែកគោដែលមានឆ្អឹងស្មាមុខបញ្ឈរត្រង់ពេកនឹងធ្វើឱ្យសត្វដើរមានដំណើរខ្លីៗ ហើយច្រើនសំយុងក្បាលចុះក្រោម និងអាចពិបាកងើយក្បាលឱ្យផុតកម្ពស់ខ្នងវា។ ជាទូទៅគោដែលមានស្មាមុខត្រង់ច្រើនមានទម្រង់ជើងក្រោយបញ្ឈរត្រង់ដូចគ្នា ដែលវាអាចជាបញ្ហាធ្វើឱ្យសត្វច្រើនងាយរងបញ្ហាសន្លាក់ដោយសារនៅត្រង់តំណឆ្អឹងត្រង់សន្លាក់ត្រូវទ្រទម្ងន់សង្កត់ដោយផ្ទាល់។

ចំនុចមួយទៀត ចំពោះគោដែលមានសាច់ស្មាមុខរីកចេញធំពេកនៅពេលមើលពីលើ អាចធ្វើឱ្យកូនមានស្មាធំដែរ ដែលនេះអាចធ្វើឱ្យកូនពិបាកកើត។ ប៉ុន្តែបញ្ហាពិបាកកើតនេះទាក់ទងនឹងទៅនឹងកត្តាផ្សេងៗជាច្រើនទៀតជាច្រើនដូចជាពូជ ទំហំបា ទំហំមេ (ឆ្អឹងត្រគាក) ទំហំកូន និងប្រភេទមេក្រមុំ ឬមេចាស់ជាដើម។ 

៣. ការពិនិត្យជើងមុខ

នៅពេលមើលចំពីមុខសត្វ ជើងគោគួរមានលក្ខណៈបញ្ឈរត្រង់ ដោយសារជើងមុខត្រូវទ្រទម្ងន់ស្ទើរតែពាក់កណ្តាលនៃទម្ងន់ដងខ្លួន។ គេអាចវាយតម្លៃជំហរជើងមុខបានដោយចាប់ចំនុចបញ្ឈរនៅត្រង់ពីចំនុចទ្រូងមុខម្ខាងៗ រួចទម្លាក់ចំណោលចុះមកប្រអប់ជើងដូចមានគំនូសបង្ហាញក្នុងរូប ហើយប្រសិនបើអ្នកពិនិត្យឃើញត្រង់ចំនុចជង្គង់ញែកចូល ឬចេញពីបន្ទាត់នោះ វាបង្ហាញថាសត្វអាចនឹងមានបញ្ហាក្នុងការដើរ។ ចំពោះគោដែលមានជើងមុខញែកចេញក្រៅទំនងជាមានបញ្ហាធ្ងន់ធ្ងរជាង ដោយសារវាមិនសូវមានជំហរឈររឹងមាំ និងអាចដើរអូសជើង ហើយវាក៏ច្រើនមានស្មាមុខរីធំពេកផងដែរ។

បន្ថែមពីនេះ អ្នកក៏ត្រូវពិនិត្យលើប្រអប់ជើងផងដែរ ព្រោះប្រអប់ជើងអាចមានផលប៉ះពាល់ទៅដល់ទម្រង់ជើងមុខ និងស្មារបស់សត្វ។ គោដែលមានប្រអប់ជើងដុះមិនពេញស្មើល្អ ឬដុះច្រើនជ្រុលអាចកាត់បន្ថយការដើរ និងធ្វើឱ្យប៉ះពាល់ដល់ដំណើររបស់សត្វ និងពេលខ្លះអាចធ្វើឱ្យមានបញ្ហារលាកក្រចកជើង។ ប្រអប់ជើងដែលមានទម្រង់ល្អត្រូវមានមុំបញ្ឈរសមល្មម មិនផ្តេកពេក ឬបញ្ឈរពេក។

៤. ការពិនិត្យក្រចកជើង

នៅពេលអ្នកចាប់ផ្តើមពិនិត្យប្រអប់ជើង និងក្រចកជើង ប្រអប់ជើងម្ខាងៗគួរតែមានច្រវែបជើង ឬក្រចកទាំងពីរស្មើគ្នា និងមានទំហំធម្មតា មិនវែង ឬខ្លីពេក។ ចំណែកក្នុងករណីដែលក្រចកជើងទាំងពីរមានម្ខាងធំម្ខាងតូចមិនស្មើគ្នា ក្រចកជើងកោងចូលគ្នា ឬក្រចកមានប្រហោង អ្នកមិនគួរជ្រើសរើសវាទុកឡើយ។ គួរចៀសវាងគោដែលមានក្រចកជើងដុះវែងមិនស្មើ ឬកោង ឬក្រចកជើងមានប្រហោងកណ្តាលធំដូចកន្ត្រៃ។

៥. ការពិនិត្យជើងក្រោយ

ការពិនិត្យវិនិច្ឆ័យទម្រង់ជើងក្រោយរបស់គោគឺប្រហាក់ប្រហែលទៅនឹងជើងមុខដែរ។ ចំនុចដែលត្រូវពិនិត្យសំខាន់នោះគឺមុំរបស់គន្លាក់ជើង ថាតើមានលក្ខណៈសមល្មម បញ្ឈរត្រង់ពេក ឬកោងពេក។ សត្វដែលមានជើងត្រង់ពេកច្រើនមានដំណើរដើរខ្លីៗ នឹងអាចប្រឈមនឹងបញ្ហាសន្លាក់ដោយសារទម្ងន់សង្កត់ជ្រុល និងអាចមានរបួសពីការដួលដោយសារងាយបាត់ជំហរនៅពេលឡើងពាក់មេ ហើយក៏អាចប៉ះពាល់ដល់ចំណង់ភេទរបស់សត្វផងដែរសម្រាប់សត្វដែលមានទម្រង់ជើងបែបនេះ។

ការបង្កើតឱ្យមានកម្មវិធីជ្រើសរើសបាល្អបំផុតឱ្យបានពេញលេញត្រឹមត្រូវតាមបច្ចេកទេសនឹងជួយធ្វើឱ្យកសិដ្ឋានអ្នកអាចផលិតកូនគោជំនាន់ក្រោយល្អៗ និងធ្វើឱ្យការកែលម្អពូជទទួលបានជោគជ័យ។

រក្សាសិទ្ធិ © អូប៊ី ឡាយស្តុក អ្នកឯកទេសបសុសត្វ